Mabingwa wa soka Tanzania Bara Yanga, wanatarajiwa kushuka uwanjani mwezi ujao kukabiliana na CFFA FC ya Madagascar, katika mchezo wa raundi ya pili ya kufuzu hatua ya makundi ya Ligi ya Mabingwa Afrika (CAFCL).
Hatua hiyo inakuja baada ya timu zote mbili kukamilisha ratiba zao za raundi ya kwanza mwishoni mwa wiki hii na kufanikiwa kusonga mbele kwa ushindi wa jumla.
Yanga ilijihakikishia nafasi hiyo jana Septemba 12, baada ya kuibuka na ushindi mgumu wa mabao 2-1 dhidi ya Gaborone United ya Botswana kwenye Uwanja wa Azam Complex, Chamazi.
Mabao ya Wananchi katika mchezo huo yalifungwa na washambuliaji Peter Shalulile na Cheikh Ibrahima Toure.
Ushindi huo unafanya Yanga isonge mbele kwa jumla ya mabao 3-2, kufuatia sare ya kufungana bao 1-1 waliyoipata katika mchezo wa kwanza uliopigwa ugenini jijini Gaborone wiki iliyopita.
Kwa upande wao, wapinzani wa Yanga, CFFA FC, wamekata tiketi hiyo baada ya kuiondoa Lijabatho FC ya Lesotho kwa jumla ya mabao 3-1.
Miamba hiyo ya Madagascar ilishinda mechi ya kwanza kwa mabao 2-0 nyumbani kabla ya kulazimisha sare ya 1-1 ugenini jana.
Kulingana na ratiba ya Shirikisho la Mpira wa Miguu Afrika (CAF), Yanga itaanzia ugenini kati ya Oktoba 16 na 18, 2026, ambapo mchezo huo unatarajiwa kupigwa nchini Mauritius kutokana na viwanja vya Madagascar kutokidhi vigezo vya CAF.
Mchezo wa marudiano utapigwa jijini Dar es Salaam kati ya Oktoba 23 na 25, 2026, ambapo mshindi wa jumla atajikatia tiketi ya kucheza hatua ya makundi ya michuano hiyo mikubwa zaidi kwa ngazi ya klabu barani Afrika.
Kocha mkuu wa Yanga, Manqoba Mngqithi, amewataka mashabiki kuendelea kuipa nguvu timu hiyo akisisitiza kuwa malengo yao msimu huu ni kufika mbali zaidi kimataifa.
