Kocha Mkuu wa Yanga Princess, Edna Lema, ameweka wazi dhamira ya kikosi chake kuvunja rekodi mbaya ya matokeo dhidi ya Simba Queens wakati timu hizo zitakapokutana katika nusu fainali ya Ngao ya Jamii kesho Jumatano kwenye Uwanja wa KMC Complex.
Lema amesema Yanga Princess imejiandaa vya kutosha kwa mchezo huo, licha ya kukiri kuwa timu yake imekuwa ikipata wakati mgumu katika michezo ya hivi karibuni dhidi ya Simba Queens.
Kocha huyo amesema maandalizi yaliyofanyika pamoja na maboresho yaliyofanywa kwenye kikosi yanampa matumaini kwamba Yanga Princess inaweza kupata matokeo tofauti safari hii.
“Tumejiandaa vizuri kuelekea kwenye mechi yetu dhidi ya Simba. Tunajua hatujawa na matokeo mazuri kwenye michezo iliyopita dhidi ya mpinzani wetu, ila tumejiandaa vizuri kuelekea kwenye mchezo wa kesho. Tunaomba mashabiki wetu kuendelea kutuamini, hatutowaangusha,” alisema Lema.
Lema: Mechi haitakuwa rahisi
Lema anatambua ukubwa wa changamoto inayowakabili kutokana na ubora wa Simba Queens, lakini anaamini Yanga Princess ina uwezo wa kushindana na kupata ushindi.
Kwa mujibu wa kocha huyo, uwepo wa wachezaji wapya katika kikosi chake unaweza kuwa changamoto, lakini pia anaona upande chanya kutokana na Yanga Princess kuwafahamu wapinzani wao.
“Hakika tunakwenda kukutana na mchezo mgumu, haiwezi kuwa mechi nyepesi kwa sababu tuna wachezaji wapya kwenye timu yetu. Ila tuna faida ya kuwafahamu wapinzani wetu Simba Queens, wao hawajui wachezaji wetu vizuri. Lakini sisi tunajiamini, tuna timu nzuri ya kushindana msimu huu,” alisema.
Lema pia amethibitisha kuwa kikosi chake kiko katika hali nzuri kuelekea mchezo huo, akisema hakuna mchezaji mwenye majeraha kwa sasa.
“Wachezaji wetu wote wapo vizuri, hakuna majeruhi yoyote hadi sasa na hatuna sababu ya kusingizia kuelekea mchezo wetu wa kesho. Benchi la ufundi wote tunataka kushinda,” alisema.
Diana Mnally: Tunataka kubadili upepo
Kwa upande wa wachezaji, Diana Mnally amesema Yanga Princess imejipanga kutumia mchezo huo kubadili historia ya matokeo dhidi ya Simba Queens.
Mnally amesema wamekutana mara kadhaa na Simba Queens bila kupata matokeo waliyoyataka, lakini hilo limekuwa sehemu ya maandalizi yao kuelekea msimu mpya.
“Sio mara moja wala mara mbili kukutana na Simba Queens, ila hatukuwa na matokeo mazuri kwa kipindi hicho. Sasa hivi ni msimu mwingine, tumejiandaa vizuri na tunahitaji matokeo mazuri ili tusahau yaliyopita kutokana na maandalizi yetu kuelekea mchezo,” alisema Mnally.
Hakuna hofu Yanga Princess
Mnally amesema licha ya kuwepo kwa wachezaji wapya katika kikosi hicho, hakuna hofu ndani ya timu kuelekea nusu fainali hiyo.
Amesema benchi la ufundi limewasaidia wachezaji kuelewa ukubwa wa mchezo na namna ya kukabiliana na ushindani wa Simba Queens.
“Hakuna mwenye uwoga kwenye timu yetu. Japo wapo wageni kwenye kikosi chetu, ila tumeshaongea kuhusu mchezo ulivyo na wamejiandaa vizuri kwa sababu wanaelewa kila ligi kuna ushindani. Hivyo tumejiandaa vizuri kimwili na kiakili ili kushinda dhidi ya Simba Queens,” alisema.
Maandalizi yamekamilika
Kwa mujibu wa Mnally, Yanga Princess imefanya mazoezi ya kutosha kabla ya mchezo huo na sasa wanachosubiri ni kuingia uwanjani kutekeleza kile walichokifanyia kazi.
Mchezaji huyo amewataka mashabiki wa Yanga kuendelea kuwa nyuma ya timu na kuwapa sapoti katika mchezo huo muhimu.
“Tumefanya mazoezi ya kutosha kuelekea kwenye huo mchezo. Pia tunawaomba mashabiki wetu wasiache kutuunga mkono, waendelee kutusapoti na kutuamini. Tunawaahidi kitu kizuri kwenye mchezo wa kesho,” alisema.
Nusu fainali ya kuamua nani aende fainali
Mchezo wa Yanga Princess na Simba Queens unatarajiwa kuwa miongoni mwa michezo yenye mvuto mkubwa katika Ngao ya Jamii, kutokana na ushindani uliopo kati ya timu hizo.
Kwa Yanga Princess, ushindi utakuwa tiketi ya kwenda fainali na pia nafasi ya kuanza msimu kwa mafanikio dhidi ya mpinzani ambaye wamekuwa wakipata matokeo yasiyoridhisha katika mikutano yao ya karibuni.
