Kiungo mshambuliaji wa Yanga Albert Kangwanda jana hakuanza vizuri mchezo wa ligi ya mabingwa dhidi ya CFFA akipoteza umakini na kuinyima Yanga mabao ya mapema kipindi cha kwanza.
Kangwanda aliibua mjadala mkali kwenye mitandao ya kijamii baadhi ya mashabiki wakiona kama haipambanii nembo ya Yanga kwa asilimia 100.
Hata hivyo mchezaji huyo ni kama hata mwenyewe alifahamu hakucheza vizuri kwenye kipindi cha kwanza cha mchezo huo ambao Yanga iliibuka na ushind wa mabao 4-0.
Meneja wa Habari na Mawasiliano wa Yanga Ali Kamwe amefichua baada ya wachezaji kuingia kwenye vyumba vya kubadilishia nguo wakati wa mapumziko, Kangwanda alimuomba kocha Manqoba Mngqithi asimtoe, akiomba angalau dakika 15 ili akasahihishe makosa yake.
Hicho ndicho alichofanya MVP huyo wa ligi kuu ya Zambia msimu uliopita kwani dakika 15 za kipindi cha pili alizitumia ipasavyo akifunga bao moja na kutoa pasi mbili za mabao na kuihakikishia Yanga ushindi huo mnono wa mchezo wa mkondo wa kwanza kuwania tiketi ya hatua ya makundi CAFCL.
Hata hivyo Kangwanda alishindwa kumaliza mchezo huo baada ya kupata majeraha.
