Kaimu kocha mkuu wa Yanga, Simon Dladla, amesema timu yake inahitaji kuboresha umaliziaji wa nafasi za kufunga mabao licha ya kupata pointi tatu katika mchezo wa ligi kuu dhidi ya Mashujaa FC.
Akizungumza baada ya mchezo huo uliopigwa uwanja wa KMC Complex jana Yanga ikiibuka na ushindi wa mabao 2-1, Dladla alisema bao la mapema lililofungwa na Mashujaa FC liliufanya mchezo kuwa mgumu kwa Yanga, huku wapinzani wao wakibadilisha mbinu na kujikita zaidi katika kujilinda ili kuzuia mashambulizi ya Wananchi.
Alisema baada ya Yanga kuanza kutafuta bao la kusawazisha, presha ya kutaka kurejesha mchezo katika hali ya usawa ilichangia timu hiyo kushindwa kutumia ipasavyo nafasi ilizozitengeneza mbele ya lango la wapinzani wao.
Kocha huyo pia ameeleza kuwa majeraha ya baadhi ya wachezaji yalilazimisha kufanya mabadiliko ambayo yaliathiri mwenendo wa mchezo, hususan kipindi cha pili.
Kwa mujibu wa Dladla, hali hiyo iliifanya Yanga kukutana na changamoto zaidi katika kutekeleza mipango yake ya mchezo, licha ya kuendelea kupambana kutafuta matokeo mazuri.
Pamoja na changamoto hizo, Dladla alisema ameridhishwa na pointi tatu ambazo timu yake imefanikiwa kuzipata, akisisitiza kuwa ushindi huo ni muhimu kwa Yanga.
Hata hivyo, amebainisha kuwa bado kuna kazi ya kufanya katika eneo la umaliziaji ili kuhakikisha timu inatumia vizuri nafasi inazozipata na kuepuka kujiweka katika presha isiyo ya lazima wakati wa mechi.
Dladla anaamini ubora wa kikosi cha Yanga umechangia timu hiyo kupata ushindi, lakini amesisitiza umuhimu wa kuongeza ufanisi mbele ya lango ili kuifanya timu kuwa bora zaidi katika michezo ijayo.
