Yanga inaendelea kujifua Kurasini

Kikosi cha Yanga kimeendelea kujifua katika uwanja wa chuo cha Polisi Kurasini jijini Dar es salaam chini ya kocha wake Mkuu Mwinyi Zahera.

Yanga ilianza mazoezi na wachezaji nane iliyokuwa nao msimu uliopita lakini idadi imekuwa ikiongezeka siku hadi siku.

Katika mazoezi hayo pia kumekuwa na idadi kubwa ya wachezaji wapya wanaofika kujaribiwa ikiwa ni maagizo ya kocha Mkuu wa timu hiyo.

Wachezaji wa Kimataifa nao wameendelewa kujaribiwa ili kujiridhisha na viwango vyao kabla ya kuwasajili.

Ifahamike wachezaji wote wanaojaribiwa wametakiwa na Yanga, si kwamba wamejipeleka wenyewe. Wengi wametoka timu zinazoshiriki ligi kuu katika mataifa mbalimbali barani Afrika.

Mmoja wa wajumbe wa Kamati ya Usajili amesema tayari kuna wachezaji wamefuzu majaribio hayo na wanakamilisha kuwasajili.

Moja ya masharti yaliyowekwa na Yanga ni kuwa baada ya mchezaji kufuzu majaribio atafanyiwa vipimo vya afya kubaini utimamu wa afya yake kabla ya kusaini mkataba

Msimu uliomalizika Yanga ilikumbwa na changamoto ya wachezaji waandamizi kuwa majeruhi, imedhamiria kusajili wachezaji wenye afya timamu.

Mwenyekiti wa kamati ya usajili ya Yanga Hussein Nyika amesema zoezi la usajili liko mbioni kukamilika na kwa wakati muafaka watatangaza wachezaji waliosajiliwa na wale waliopewa mkono wa kwa heri.

Dirisha la usajili lilifunguliwa Juni 15, 2018 na litafungwa Julai 26 2018.