Furaha tunaianza rasmi Julai 29 - Ngassa

Mmoja wa wachezaji walioongezwa kwenye kikosi cha Yanga kinachoshiriki michuano ya kombe la Shirikisho, Mrisho Ngassa amesema furaha itarejea rasmi Jangwani tarehe 29 Julai 2018 kwenye mchezo dhidi ya Gor Mahia utakaopigwa dimba la Taifa.

Ngassa, Deus Kaseke na Heritier Makambo majina yao yalitumwa CAF ikiwa ni usajili mpya kwa ajili ya michuano ya kombe la Shirikisho.

Hata hivyo wachezaji hao juzi hawakujumuishwa kwenye kikosi cha Yanga kilicholazwa mabao 4-0 na Gor Mahia sababu ikielezwa kuchelewa kutumwa kwa majina yao CAF.

Imeelezwa tayari CAF imeidhinisha usajili wa wachezaji hao hivyo wanaweza wakatumiwa na Yanga katika mchezo ujao.

Yanga inatarajiwa kuendelea na mazoezi kesho kujiandaa na mchezo huo ambao itahitaji kushinda ili kufufua matumaini ya kutinga robo fainali.

Licha ya kushika nafasi ya nne kwenye msimamo wa kundi D ikiwa na alama moja, Yanga ina michezo miwili ya nyumbani ambayo kama itashinda inaweza kufikisha alama saba kabla ya mchezo wake wa mwisho dhidi ya Rayon Sports ugenini.

Gor Mahia iliyo nafasi ya pili ina alama tano lakini imebakisha mchezo mmoja wa nyumbani dhidi ya Rayon Sports.

Rayons Sports iko nafasi ya tatu ikiwa na alama mbili, ina mchezo mmoja wa nyumbani dhidi ya Yanga.

Gor Mahia na Rayon Sports zote zitasafiri kwenda Algeria kuikabili USM Alger ambayo inaongoza kundi D ikiwa na alama saba.