Yanga kumuongezea Zahera makocha wawili

Katika kuliboresha benchi la ufunsi la Yanga, Mwenyekiti wa kamati ya usajili Hussein Nyika amesema kabla ya ligi kuanza kamati yao imelazimika kuvunja benki kuhakikisha inashusha makocha wawili, mmoja mzawa na mwigine wa kigeni ili kumsaidia Mwinyi Zahera na kuimarisha benchi la ufundi.

Nyika amesema wanataka kumshusha Kocha Msaidizi namba moja wa Zahera ambaye lazima awe mzawa ili kuchukua nafasi ya Shadrack Nsajigwa ambaye mkataba wake ulimalizika.

Awali Yanga ilimpokea Kocha Mkongo Gay Bukasa ambaye aliondoka kimyakimya baada ya kushindwa kufikia makubaliano na uongozi wa yanga.

Kwa muda mrefu Yanga imekuwa ikihusishwa na mpango wa kumpa ajira kocha wa Kagera Sugar, Mecky Maxime kuja kusaidiana na Zahera akiambatana na Mzambia Noel Mwandila.

Mbali na kocha huyo pia Nyika alisema wanataka kumalizana haraka na kocha Mkenya wa makipa Razack Siwa ambaye alitua nchini wiki iliyopita anayekuja kuchukua nafasi ya Juma Pondamali.

“Tunataka kuongeza nguvu katika benchi letu, tunataka pia kuongeza kocha mmoja mzawa atakayeungana na Mwandila kumsaidia kocha Zahera lakini pia tunaona kuna mashaka ya kiufundi katika kocha wa makipa.

“Kama mlivyoona kwasasa tupo katika mazungumzo ya mwisho na kocha Siwa nafikiri sasa tutamalizana naye ili aje aanze kazi haraka kupandisha viwango vya makipa wetu,” Nyika ameuambia mtandao wa Mwanaspoti.