Unakosaje kushuhudia Nadir anavyoagwa August 12 uwanja wa Jamhuri?

Kikosi cha Yanga kiko mkoani Morogoro kikiendelea na maandalizi ya msimu mpya pamoja na michezo iliyobaki ya michuano ya kombe la Shirikisho dhidi ya USM Alger (Aug 19) na Rayon Sports (Aug 28).

Aidha, Yanga inatarajia kumuaga nahodha wake, Nadir Haroub maarufu kama Cannavaro kwa kucheza mchezo wa kirafiki na Mawenzi FC ya Morogoro inayoshiriki Ligi Daraja la Kwanza.

Mchezo huo utachezwa Agosti 12, kwenye Uwanja wa Jamhuri mkoani Morogoro.

Yanga imeamua kumuaga Cannavaro kwa shamrashamra za aina yake kwani siku hiyo Uwanja wa Jamhuri utakuwa na burudani za kila aina kuanzia asubuhi.

Wasanii wakiwemo mwigizaji Wema Sepetu, Msaga Sumu na Juma Nature wanatarajiwa kuwa sehemu ya Burudani hiyo.

Siku hiyo pia kutakuwa na tukio la uzinduzi rasmi wa timu ya Wanawake ya Yanga itakayofahamika kama Yanga Queens.

Wachezaji wapya kutambulishwa

Yanga itatumia mchezo dhidi ya Mawenzi FC kutambulisha wachezaji wake wapya waliosajiliwa kwa ajili ya msimu wa 2018/19.

Klaus Kindoki, Heritier Makambo, Jaffar Mohammed, Mrisho Ngassa, Mohammed Issa 'Banka', Deus Kaseke na fundi Feisal Salum 'Fei Toto' wote wataonekana rasmi dimbani wakianza kuitumikia Yanga.