Mfumo wa viingilio kwenda kwa mwenyeji kuziumiza timu 'ndogo'

Utaratibu wa kugawana mapato ligi kuu ya Tanzania Bara msimu huu wa 2018/19 umebadilishwa ambapo timu mwenyeji itachukua mapato yote ya mlangoni.

Tayari utaratibu huo umeanza kutia hofu kuwa utaziumiza baadhi ya timu hasa zenye mashabiki wachache.

Msemaji wa Mtibwa Sugar Thobias Kifaru amesema utaratibu huo utazinufaisha baadhi ya timu ambazo zina wigo mpana wa mapato na mashabiki wengi.

Aidha kukosekana kwa mdhamini wa ligi kuu ya Tanzania Bara msimu huu inatajwa kuwa sababu nyingine ambayo itaziumiza timu kama utaratibu wa kugawana mapato hautatizamwa upya.

"Sisi (Mtibwa Sugar) hatuna tatizo kwa sababu timu yetu inaendeshwa na kampuni, lakini utaratibu huu ni pigo kwa timu zenye mashabiki wachache," alisema Kifaru.

"Mashabiki hawajitokezi kwa wingi huko mikoani isipokuwa zinapokwenda kucheza timu kama Yanga, Simba na pengine Azam FC, Mtibwa Sugar na Singida United."

"Timu hizi zenye mashabiki wachache hazitamudu gharama za uendeshaji," amesema.

Mabadiliko hayo ya mapato kuchukuliwa na timu mwenyeji yanaelezwa kuwa ni mapendekezo ya timu shiriki za ligi kuu ya Tanzania.

Hata hivyo uamuzi huo ulifikiwa wakati kukiwa na matarajio kuwa ligi hiyo ingekuwa na mdhamini.