Zahera ahofia kucheza mechi ya kirafiki katikati ya ligi

Huenda ule mchezo wa kirafiki kati ya Yanga dhidi ya Singida United uliokuwa umepangwa kupigwa mkoani Kigoma keshokutwa umefutwa.

Awali Yanga ilitarajiwa kusafiri kwenda mkoani humo lakini kocha Mkuu wa mabingwa hao wa kihistoria Tanzania, Mwinyi Zahera amegoma timu yake kucheza mchezo wa kirafiki katikati ya ligi.

Zahera ambaye amerejea kwao DR Congo kwa ajili ya majukumu ya timu ya Taifa, ameagiza kikosi chake kiendelee na mazoezi kujiandaa na mchezo wa ligi kuu dhidi ya Stand United utakaopigwa uwanja wa Taifa Septemba 16.

Yanga iliyokuwa mwenyeji wa mchezo huo, ilipanga kuutumia kujiongezea mapato kwa kuupeleka mkoani Kigoma ambako ni muda mrefu mashabiki wake wamekosa kuzishuhudia timu za ligi kuu.

Lakini hofu ya kuongeza majeruhi kikosini imemfanya bosi huyo wa benchi la Ufundi kuugomea mchezo huo.

Yanga tayari inakabiliwa na wachezaji majeruhi kama Juma Abdul, Heritier Makambo, Mohammed Banka na Juma Mahadhi.

Baadhi ya wachezaji tayari wameanza mazoezi mepesi huku wakiendelea na matibabu kuhakikisha wanakuwa tayari kuitumikia Yanga kwenye michezo ijayo ya ligi.