Tambwe amkosha Zahera

Kocha Mkuu wa Yanga Mwinyi Zahera amefurahishwa na kiwango kilichoonyeshwa na mshambuliaji Amissi Tambwe kwenye mchezo dhidi ya Singida United.

Katika mchezo huo uliopigwa juzi kwenye uwanja wa Taifa, Tambwe alifunga mabao yote mawili ya Yanga.

Zahera amesema kupitia mchezo huo amebaini kuwa Tambwe ni mmoja wa washambuliaji bora kwani hafanyi makosa anapopata nafasi langoni

Amesema Tambwe ana uwezo mkubwa wa kuzifumania nyavu na alidhihirisha hilo juzi kwa kufunga mabao kutoka nafasi mbili alizopata

"Tambwe ni mchezaji mzuri, anajua kukaa sehemu sahihi ya kufunga kama alivyofanya dhidi ya Singida United ni mabao ambayo hakuchezea nafasi alizozipata, hii inaonyesha namna alivyomakini kutambua majukumu yake anapokuwa uwanjani," amesema Zahera

Mchezo wa Jumapili Zahera atakuwa na uamuzi wa kutumia mshambuliaji mmoja au wawili baada ya kurejea kwa Tambwe huku Makambo nae akiwa amepona majeraha yake.

Majeraha yalimpoozesha Tambwe

Ni bahati mbaya kocha Mwinyi Zahera ametua Yanga wakati ambao Tambwe hakuwa kwenye kiwango bora kutokana na kusumbuliwa na majeraha ya goti kwa muda mrefu.

Msimu uliopita, Tambwe alikuwa nje karibu msimu na ilimlazimu kufanya kazi ya ziada kuweza kurejea dimbani kusakata kabumbu.

Rekodi yake ya kupachika mabao inamfanya awe mmoja wa washambuliaji bora kuwahi kutokea kwenye ligi ya Tanzania bara.

Sambamba na Makambo, anaweza kuibeba Yanga msimu huu kama hatayumbishwa na majeraha.

Tangu atue Tanzania msimu wa 2012/13 Tambwe amefunga mabao 68 kwenye ligi kuu ya Tanzania Bara, akiibuka kuwa mfungaji bora misimu ya 2012/13 na 2015/16.

Ukiondoa msimu uliopita ambao majeraha yalimuweka nje, tangu atue Tanzania mwaka 2013, Tambwe amekuwa akifunga mabao zaidi ya 10 katika kila msimu.