Wachezaji wa Yanga walioitwa Stars kesho uwanja wa Taifa 'kama kawa'

Beno Kakolanya, Gadiel Michael, Andrew Vicent, Kelvin Yondani na Feisal Salum 'Fei Toto' watakuwa sehemu ya kikosi cha Yanga kinatakachoivaa Mbao FC kwenye mchezo wa ligi kuu ya Tanzania utakaopigwa kwenye uwanja wa Taifa Jumapili.

Wachezaji hao wamekuwa wakijifua kwenye kambi ya timu ya Taifa chini ya kocha Emmanuel Amunike na kesho wataruhusiwa kuitumikia Yanga.

Kikosi cha Yanga leo kimefanya mazoezi ya mwisho kwenye uwanja wa Chuo cha Polisi Kurasini jijini Dar es salaam tayari kwa mchezo huo unaosubiriwa kwa hamu.

Wakati Kocha Msaidizi wa Yanga Noel Mwandila akiwahakikishia Wana Jangwani kuwa kesho Mbao hazitatoka salama kwenye uwanja wa Taifa, Amri Said kocha wa Mbao ametamba kuwa timu yake imepania kupata ushindi kama ilivyofanya mchezo dhidi ya Simba.