Zahera amtahadharisha Makambo, benchi linamuita asipobadilika

Mshambuliaji Heritier Makambo alianza msimu kwa kasi akipachika mabao kwa wastani wa karibu kila mchezo.

Hata hivyo kwa siku za karibuni kasi ya kuzifumania nyavu ya Mcongoman huyo aliyetua Yanga kutoka Fc Lupopo ya DR Congo, imekuwa ndogo

Katika michezo saba aliyoichezea Yanga kwenye ligi, Makambo amefunga mabao matatu sawa na kiungo Ibrahim Ajib.

Kocha Mkuu wa Yanga Mwinyi Zahera amemtaka mshambuliaji huyo aongeze juhudi na kuhakikisha anazitumia ipasavyo nafasi anazopata kabla benchi halijamuita.

Akizungumza na waandishi wa habari juzi baada ya mchezo dhidi ya KMC, Zahera aliyekuja na utaratibu wa kuwakosoa wachezaji wake hadharani, alisema hakufurahishwa na kiwango kilichoonyeshwa na mshambuliaji huyo.

Zahera alisema amemtahadharisha mshambuliaji huyo na kumtaka abadilike. Na kama hatabadilika hatamtumia katika michezo ijayo.

"Nimemwambia abadilike, aache mambo yake ya hovyo. Afanya mazoezi vizuri ale vizuri na alale vizuri. Akiendelea kucheza vibaya hatapata nafasi kwenye timu yangu," alisema

Yanga itashuka tena dimbani Jumanne ijayo kuikabili Lipuli Fc kwenye mchezo wa ligi kuu ya Tanzania Bara mzunguuko wa 12.