Nyika na siri ya usajili Yanga

Mwenyekiti wa Kamati ya usajili ya Yanga Hussein Nyika amesema timu hiyo itakamilisha usajili wa nyota wapya wiki ijayo kabla ya kufungwa kwa dirisha dogo la usajili

Dirisha la usajili lilifunguliwa Novemba 15 na litafungwa Disemba 15, siku kumi zikiwa zimesalia kuanzia leo.

Kumekuwa na majina ya wachezaji yanayotajwa kuwa mbioni kutua Jangwani lakini Nyika amegoma kuweka hadharani majina ya wachezaji walio katika mazungumzo nao hadi pale taratibu zote za usajili zitakapokamilika

Mchezaji pekee ambaye mchakato wake uko wazi ni winga Reuben Bomba kutoka Jamhuri ya Kidemokrasia ya Congo ambaye yuko nchini kukamilisha taratibu za usajili

Wachezaji wengine wanaotajwa ni pamoja na beki wa Lipuli Ally Mtoni 'Sonso' ambaye mwenyewe amekiri kumalizana na uongozi wa Yanga akisubiri kukamilika kwa mazungumzo baina ya Lipuli na Yanga

Mwingine anayedaiwa kuwa kwenye mazungumzo na uongozi wa Yanga ni winga John Tiber ambaye ameomba aachwe na klabu ya Singida United iliyokimbiwa na wachezaji wengi baada ya kukumbwa na 'ukata'

Wengine ni kiungo Kenny Ally, washambuliaji Nelson Senkatuka (Mganda) , Eliud Ambokile na Vitalis Mayanga

Ikumbukwe pia Yanga itamuongeza kikosini mchezaji wake Mohammed Issa 'Banka' ifikapo Februari 2019 atakapokuwa amemaliza adhabu ya kufungiwa miezi 14.

Banka ataruhusiwa kuanza kujifua na kikosi cha Yanga kuanzia mwezi ujao na ataanza kuitumikia Yanga Februari 08.