Usajili wa Boban 'wamkosha' Yondani

Nahodha wa Yanga Kelvin Yondani amezungumzia usajili wa mkongwe Haruna Moshi 'Boban' kuwa utainufaisha timu hiyo.

Yondani anayefahamiana vizuri na Boban ambaye walicheza pamoja timu ya Simba, amesema baada ya kuwa na kikosi kilichosheheni wachezaji wengi vijana, ilikuwa ni muhimu kwa Yanga kuongeza wachezaji wakongwe kama Boban ambao wana uzoefu utakaosaidia kuipa timu mafanikio.

Yondani amewataka mashabiki wa Yanga kuwa na subira kuona 'vitu' vya Boban dimbani huku akiwaambia wale wanaokosoa kuwa watatulia atakapoanza kuitumikia timu hiyo

“Kama unakumbuka msimu uliopita timu yetu ilikuwa ina watoto wengi hali iliyosababisha tuukose ubingwa kutokana na kukosa uzoefu wakati timu ikipambana kupata matokeo mazuri," Yondani amenukuliwa na hazeti la Championi

“Niliwahi kuwashauri viongozi tusajili wachezaji wakongwe kama akina Boban wenye uzoefu na watakaobadilisha matokeo ndani ya uwanja, hivyo nashukuru wamelifanyia kazi.

“Utaona walianza kumsajili Ngasa leo hii utaona mchango mkubwa anautoa katika timu kuzidi hao vijana aliowakuta, wanastahili pongezi katika hilo."

Yondani alifichua usajili wa Boban kutua Yanga mapema wakati uongozi wa Yanga ukiwa bado haujaweka wazi kuhusu usajili huo.

Yondani na Boban ni wachezaji marafiki wanaofahamiana vizuri kwa zaidi ya miaka kumi.

Kwenye mtandao wa Instagram, Boban anapatikana kwa jina la boban3_officialtz