Mlinda lango wa Yanga raia wa DR Congo Klaus Kindoki ameanza kudhihirisha makali yake baada ya leo kuonyesha uwezo mkubwa kwenye mchezo dhidi ya Tukuyu Stars.
Mashabiki wa Yanga waliokuwa uwanjani leo walimfanya Kindoki 'atambe' zaidi wakimshangilia kwa nguvu kila alipookoa mashambulizi ya Tukuyu Stars.
Katika mchezo huo Kindoki alifanikiwa kuokoa takribani mashambulizi matatu ambayo kama usingekuwa umahiri wake pengine Tukuyu Stars ingeweza kufunga.
Uungwaji mkono alioonyeshwa na washabiki wa Yanga leo umemfurahisha mlinda lango huyo ambaye hakuanza vizuri maisha yake katika klabu ya Yanga.
Kindoki sasa anaonekana kujiamini na kwa kiasi kikubwa ameimarisha kiwango chake na kuondoa makosa mengi aliyokuwa akiyafanya awali.
Yanga leo ilimtumia Kindoki mbele ya Kabwili ambaye alikuwa benchi baada ya kupona majeraha ya nyonga aliyopata kwenye mchezo wa ligi dhidi ya African Lyon.
Wakati hatma ya Beno Kakolanya ikiwa mikononi mwa kocha Mwinyi Zahera, kwa sasa Yanga inawategemea Kabwili na Kindoki.
Kakolanya alikuwepo uwanja wa Taifa leo kushuhudia mchezo huo ambayo Yanga iliibuka na ushindi wa mabao 4-0
