Michuano ya kombe la Mapinduzi ambayo hufanyika kila mwaka visiwani Zanzibar inatarajiwa kuanza Disemba 30 2018 na itamalizika Januari 12 2019.
Vinara wa ligi kuu ya Tanzania Bara Yanga wamethibitisha kushiriki michuano hiyo ambayo ni maalum kwa ajili kuadhimisha Mapinduzi yaliyopelekea kupatikana kwa Zanzibar huru Januari 12 1964.
Mbali na Yanga, kutoka Tanzania Bara Azam Fc na Simba nazo zimethibitisha kushiriki michuano hiyo.
Kwa upande wa visiwani Zanzibar timu zitakazoshiriki ni KMKM, Malindi, Mlandege, KVZ, JKU na Jamhuri wakati URA kutoka nchini Uganda inasubiriwa kuthibitisha ushiriki wake.
Hata hivyo Yanga huenda ikapeleka kikosi chake cha vijana visiwani humo kushiriki michuano ya mwaka huu kutokana na timu hiyo kukabiliwa na mchezo wa ligi kuu ya Tanzania bara dhidi ya Azam Fc Januari 03 2019 (kama hautaahirishwa) pia kuanzia Januari 22-27 2019 Yanga itashiriki michuano ya SportPesa Super Cup.
