Vinara wa ligi kuu ya Tanzania Bara Yanga kesho watakuwa wanasaka alama tatu muhimu dhidi ya Mbeya City kwenye mchezo wa ligi hiyo utakaopigwa katika dimba la Sokoine.
Mchezo huo unakutanisha timu mbili ambazo ziko kwenye ubora tofauti. Yanga iko katika kiwango bora zaidi ikiwa inaongoza ligi na alama zake 47 baada ya kushuka dimbani mara 17. Imeshinda michezo 15 na kutoka sare michezo miwili.
Mbeya City ina alama 23 ikiwa imeshuka dimbani mara 17 pia. Imeshinda michezo sita, imefungwa michezo sita na kutoka sare michezo mitano.
Yanga inaonekana kuwa 'on fire' na kwa hakika kitakachowasaidia Mbeya City kesho labda wenyeji wao kwa kuwa mchezo huo unapigwa kwenye dimba la Sokoine.
Kocha Mkuu wa Yanga Mwinyi Zahera amebainisha kuwa wamedhamiria kumaliza kileleni mwa msimamo wa ligi baada ya kukamilika kwa mzunguuko wa kwanza, hivyo kupata matokeo katika mchezo wa kesho na utakaobaki dhidi ya Azam Fc ni muhimu
Yanga iko mkoani Mbeya ikiwa na kikosi cha wachezaji 18 na viongozi wa benchi la ufundi wakiongozwa na kocha Zahera.
