Kocha Mkuu wa Yanga Mwinyi Zahera ni kama anasubiri tu kukabidhiwa tuzo ya kocha bora wa ligi kuu ya Tanzania Bara kwa mwezi Disemba 2018.
Zahera ambaye tayari ameitwaa tuzo hiyo mara mbili, (Septemba na Novemba), anaweza kuitwaa tena kutokana na mafanikio aliyopata na kikosi cha Yanga mwezi wa 12.
Katika mwezi huo Yanga ilicheza michezo mitano na kufanikiwa kushinda michezo yote. Ni Zahera pekee mwenye takwimu hizo za kibabe ukilinganisha na makocha wengine katika mwezi huo
Aidha washambuliaji Amissi Tambwe na Heritier Makambo wanaweza kuingia katika kinyan'ganyiro cha mchezaji bora wa mwezi huo baada ya kufanya vizuri.
Makambo aliiyeibuka mchezaji bora wa mwezi Novemba 2018, mwezi wa 12 ameifungia Yanga mabao manne na yuko katika nafasi nzuri zaidi ya kuitwaa tuzo hiyo kwa mara ya pili mfululizo.
Tambwe alifunga mabao matatu mwezi Disemba wakati beki Abdallah Shaibu 'Ninja' aliyewania tuzo ya mwezi Novemba, ameifungia Yanga mabao mawili mwezi Disemba.
Tuzo za Disemba huenda zikatawaliwa na vinara hao wa ligi kuu ya Tanzania Bara.
