Ligi Kuu ya Tanzania Bara msimu huu imekosa mvuto baada ya TFF kushindwa kuiendesha kwa weledi
Ukiachilia mbali suala la ligi kukosa mdhamini, mkanganyiko wa ratiba unaonekana kuondoa radha ya ligi hiyo
Wakati timu nyingine zikiwa zimecheza michezo 23, mabingwa watetezi Simba wamevunja rekodi kwa kuwa na michezo pungufu wakizidiwa michezo TISA
Sababu inayotolewa na Bodi ya ligi ni timu hiyo kushiriki michuano ya ligi ya mabingwa, sawa lakini maswali mengi yanaibuka ukitazama wingi wa viporo
Sidhani duniani kama kuna ligi ambayo timu moja inaweza kuwa na idadi kama hiyo ya viporo, yaweza kuwa Tanzania imevunja rekodi
Kuna wakati Simba ilipumzishwa karibu mwezi mzima kucheza michezo yao wakisubiri mechi zao za ligi ya mabingwa
Wengi walihoji 'likizo' hiyo waliyopewa Simba lakini walipuuzwa
Wakati huu ligi ikiwa imeingia mzunguuko wa pili ni vyema timu zote zikawa hazitofautiani michezo mingi. Sana sana isiwe zaidi ya michezo miwili
Msimu uliopita Yanga ilishiriki michuano mitatu kwa wakati mmoja, yaani ligi, kombe la Shirikisho na kombe la FA
Ilikuwa ni kawaida kwa timu hiyo kucheza kila baada ya siku mbili au tatu
Wakati mmoja ilitokea visiwa vya Shelisheli na kuunganisha moja kwa moja mkoani Ruvuma kucheza na Majimaji katika mchezo wa kombe la FA
Ilipotoka Songea ikaelekea moja kwa moja mkoani Mtwara ambako siku mbili baadae ikaumana na Ndanda Fc
Lakini hali imekuwa tofauti kwa Simba msimu huu
Ni hatari sana ligi kuwa na mazingira kama haya kwa timu moja kuwa na michezo mingi mkononi kuliko timu nyingine
Utaratibu huu unatengeneza mazingira ya kupanga matokeo
Mfano kama Simba itaendelea kurundikiwa viporo zaidi, wakati itakapoanza kucheza watakuwa na ufahamu wa matokeo gani wanapaswa kupata ili waweze kujiwekea mazingira ya kutetea ubingwa wao.
Ikumbukwe Simba iko hatarini kutoshiriki michuano ya Kimataifa msimu ujao kama haitatwaa ubingwa.
Tayari imeondoshwa kwenye michuano ya kombe la FA, na hakuna dalili njema kwao kuwa na ubavu wa kutwaa taji la ubingwa wa Afrika
Katika mazingira hayo unaweza ukatumika hata utaratibu usio wa kimichezo ili kuhakikisha lengo la kutetea ubingwa linafanikishwa
Duniani kote waandaaji wa ratiba wanahakikisha kuweka umakini ili kusitokee mazingira ya timu moja kuwa na ushawishi wa kupanga matokeo
Miaka miwili nyuma Simba iliwahi kugoma kuendelea kucheza michezo yao wakishinikiza Azam na Yanga zicheze michezo yao MITATU ya viporo lakini leo yao imefika TISA lakini hata wao wenyewe hawajishangai
Lakini hata viongozi wa timu nyingine ikiwemo Yanga hawahoji mazingira haya wakiamini kuwa timu yao inaweza kushinda michezo yote na kutwaa ubingwa bila ya kujali michezo ya mpinzani wao
Lakini ikitokea Yanga imepoteza mchezo mmoja zaidi au hata kutoka sare, kimahesabu Simba itaweza kuwaondoa kileleni kama watashinda michezo yao yote ya viporo
Ni vyema Yanga nao wakashinikiza TFF na Bodi ya Ligi wavipangie ratiba viporo hivi vya Simba ili kuhakikisha angalau kuanzia raundi ya 30 timu zote zikawe na michezo sawa kuondoa mazingira yoyote yanayoweza kushawishi upangaji wa matokeo
