Vinara wa ligi kuu ya Tanzania Bara Yanga wamefanikiwa kuondoka na alama moja mkoani Tanga baada ya kulazimishwa sare ya bao 1-1 na Coastal Union katika mchezo wa ligi kuu uliopigwa dimba la Mkwakwani
Mchezo huo ulioanza kwa kasi, ulizishuhudia timu zote zikishambuliana kwa zamu katika kipindi cha kwanza huku Yanga ikionekana kuwa hatari zaidi kwenye dakika za mwanzoni mwa kipindi hicho
Coastal Union yenye kawaida ya kutofungika kirahisi inapocheza na Yanga katika dimba lake, ilitangulia kufunga bao la kuongoza kwenye dakika ya 30 likifungwa na Haji Ugando kwa kichwa
Katika kipindi cha pili ni Yanga iliyokuwa hatari zaidi huku Coastal Union ikishambulia kwa kushitukiza
Mabadiliko ya kocha Mwinyi Zahera kumtoa nahodha Ibrahim Ajib na kumuingiza Deus Kaseke yaliisaidia Yanga kusawazisha bao hilo lililofungwa na Kaseke kwenye dakika ya 76 akimalizia krosi ya Matheo Anthony aliyepokea pasi 'mpenyezo' kutoka kwa Thabani Kamusoko
Coastal Union ilimaliza na wachezaji 10 uwanjani baada ya kiungo wake Mussa Abushehe kutolewa nje kwa kadi nyekundu kwa kumfanyia madhambi ya makusudi Gadiel Michael wakati wakiwania mpira
Matokeo hayo yataendelea kuibakisha Yanga kileleni mwa msimamo wa ligi kwa tofauti ya alama saba dhidi ya Azam Fc baada ya kufikisha alama 54
Aidha katika mchezo huo Yanga ilipata pigo baada ya kiungo wake Feisal Salum kuumia mapema katika kipindi cha pili na nafasi yake kuchukuliwa na mkongwe Haruna Moshi
