Wakati uongozi wa klabu ya Singida United ukidai kinda Gustapha Saimon hakuwa na leseni halali ya kuichezea Yanga kwenye mchezo wa ligi kuu jana, wachezaji wa Singida United Rajab Zahir na Geofrey Mwashiuya waliofungiwa na TFF mwezi Januari kutokana na makosa mbalimbali, wanalalamikiwa baada ya kucheza mchezo huo huku wakiwa hawajalipa faini walizopaswa kulipa
Zahir na Mwashiuya walifungiwa kukosa michezo mitatu na kulipa faini ya Tsh 500,000/- fedha ambazo imedaiwa hazikulipwa hivyo hawakuwa na sifa ya kucheza mchezo wa jana
Naye Mkurugenzi wa Singida United Festos Sanga amesema wamewasilisha malalamiko TFF wakipinga Yanga kumtumia Gustapha Saimon wakidai ni mchezaji halali wa timu ya daraja la kwanza ya Dar City FC
Hata hivyo Gustapha aliyepandishwa kutoka kikosi cha pili cha Yanga baada ya kufanya vizuri kwenye michuano ya kombe la Mapinduzi iliyofanyika mwezi Januari 2019 visiwani Zanzibar, ana leseni halali iliyotolewa na TFF
Nayo klabu ya Singida United imeonyesha leseni inayomtambulisha Gustapha kama mchezaji halali wa Dar City FC
Mkurugenzi wa kituo cha kulelea vipaji KISA Academy ambako ndipo alipotoka Gustapha, ametoa ufafanuzi wa kuwa kinda huyo ni mchezaji halali wa Yanga kwa kuwa klabu hiyo ilifuata taratibu zote za kumsajili
Amesema Dar City ilimuomba mchezaji huyo akacheze kwa mkopo na hata baada ya kuuzwa kwenda Yanga TFF ilifuta leseni yake ya awali aliyokuwa akitumia Dar City
