Kikosi cha Yanga kimeondoka leo jijini Dar es salaam kuelekea mkoani Lindi kwa ajili ya mchezo wa kombe la FA (ASFC) dhidi ya Namungo Fc, inayoshiriki ligi daraja la kwanza
Mchezo huo utapigwa keshokutwa Jumapili, Februari 24 2019, saa kumi kamili jioni katika uwanja wa Majaliwa
Nahodha wa Yanga Ibrahim Ajib amesema wanaenda mkoani Lindi wakiwa na lengo la kusaka ushindi ili kuweza kutinga hatua inayofuata
Aidha, Ajib amesema ushindi waliopata dhidi ya Mbao Fc juzi, umewaongezea wachezaji ari na watapambana kuhakikisha wanashinda mchezo huo wa ugenini
"Ushindi tuliopata juzi kwenye mchezo dhidi ya Mbao Fc umetuongezea ari na sasa tunaelekeza nguvu zetu Lindi kuikabili Namungo. Lengo letu ni kufanya vizuri kwenye mchezo huo ili tuweze kutinga raundi inayofuata," amesema Ajib
"Tutaenda kupambana na kuhamasishana ili kuhakikisha tunafanya vizuri kwenye kwenye mchezo huo"
Juzi Yanga iliichapa Mbao Fc mabao 2-1 katika mchezo ambao Yanga ilionyesha kandanda safi ya kushambulia kwa nguvu katika kipindi cha pili
Matokeo hayo yameongeza 'chachu' ya kusaka ushindi mchezo dhidi ya Namungo keshokutwa
Hii itakuwa mara ya pili kwa Yanga kuikabili Namungo Fc katika uwanja wa Majaliwa
Mwisho mwa mwaka 2018 timu hizo zilikutana kwenye mchezo wa kirafiki uliomalizika kwa sare ya bao 1-1
Hata hivyo kwenye mchezo huo Yanga iliwakosa baadhi ya wachezaji waliokuwa na timu ya Taifa sambamba na kocha Mwinyi Zahera aliyekuwa na timu ya Taifa ya DR Congo
