Uongozi wa klabu ya Yanga umependekeza kutumia uwanja wa Samora ulioko mkoani Iringa au uwanja wa CCM Kirumba kwa baadhi ya michezo ya ligi itakayochezwa wakati uwanja wa Taifa utakapokuwa umefungwa
Viwanja vya Taifa, Azam Complex na Uhuru vinatarajiwa kufungwa March 24 2019 kupisha ukarabati tayari kwa matumizi katika michuano ya fainali za AFCON 2019 ngazi ya vijana umri chini ya miaka 17
Fainali hizo zitafanyika jijini Dar es salaam kuanzia April 14 mpaka April 28 Tanzania ikiwa mwenyeji
Hata hivyo Bodi ya Ligi Kuu tayari imetangaza kuwa katika kipindi hicho ligi itasimama isipokuwa kwa klabu ya Simba ambayo itaendelea kucheza michezo yake ya viporo iliyopangwa kupigwa nje ya jiji la Dar es salaam
Yanga na timu nyingine zinazotumia viwanja hivyo zimetaarifiwa kutafuta viwanja vingine kwa ajili ya michezo yao ya nyumbani itakayopigwa kati ya March 24 na April 2019
Mratibu wa Yanga Hafidh Saleh amesema wanatarajia kuiandikia barua TFF kuitaarifu uwanja waliouchagua kuutumia kwa ajili ya michezo yake ya nyumbani
"Tunafahamu Uwanja wa Taifa utafungwa Machi 24, mwaka huu, baada ya mechi ya Uganda mpaka mwezi wa nne, nadhani Mwanza au Iringa inaweza kuwa eneo zuri kwa sababu uwanja ni mzuri na usafiri ni rahisi," Hafidh amenukuliwa na gazeti la Bingwa
Hivi karibuni kocha Mwinyi Zahera alieleza kuvutiwa na uwanja wa CCM Kirumba kutokana na ubora na ukaribu wake kutoka jijini Dar es salaam kwa usafiri wa ndege na sapoti kubwa ya mashabiki inayopata Yanga kila inapocheza jijini Mwanza
Zahera pia aliusifia uwanja wa Samora wa mkoani Iringa kuwa unafaa
