Baada ya kikao cha Baraza la Wadhamini la klabu ya Yanga na Kamati ya Utendaji ya Yanga, viongozi hao wamefikia makubaliano ya kufanyika kwa Uchaguzi Mkuu wa klabu hiyo wakiachana na mpango wa kufanya uchaguzi wa kujaza nafasi zilizowazi
Akizungumza na waandishi wa habari mapema leo, Mwenyekiti wa Baraza la Wadhamini la Yanga Mh George Mkuchika amesema kutokana na idadi kubwa ya viongozi wa Yanga kuwa wamejiuzulu, wameonelea ni vyema ukafanyika uchaguzi Mkuu wa kuwapata viongozi wapya, uchaguzi ambao ulipaswa kufanyika mwakani kwa mujibu wa Katiba ya Yanga
"Badala ya kufanya Mkutano Mkuu wa uchaguzi wa kuziba mapengo, tumekubaliana kwa kauli moja, Baraza la Wadhamini, Kamati ya Utendaji na wenzetu wa kanda mkoa wa Dar es salaam, tumekubaliana tufanye Mkutano Mkuu wa Uchaguzi mwaka huu," amesema Mkuchika
Nae Kaimu Mwenyekiti wa Yanga Samwel Lukumay amesema viongozi wa timu hiyo wamekubaliana na Baraza la Wadhamini juu ya kufanyika kwa Uchaguzi Mkuu wa kuwapata viongozi wapya mwaka huu badala ya mwakani.
Amesema ni kweli viongozi wengi wameachia ngazi, pia mwakani kutakuwa na uchaguzi Mkuu wa Serikali, hivyo ni vyema badala ya kufanya uchaguzi mdogo wa kujaza nafasi zilizowazi halafu mwakani kufanya tena uchaguzi Mkuu, ni vyema uchaguzi huo ukafanyika mwaka huu
Lukumay amesema wataitisha Mkutano Mkuu wa Wanachama wa klabu ya Yanga hivi karibuni
