Aliyekuwa nahodha wa kikosi cha Yanga kwenye mchezo dhidi ya Lipuli Fc Thabani Kamusoko amesema wamekubaliana na matokeo ya kufungwa bao 1-0 jana na wanajipanga kwa ajili ya mchezo unaofuatia
Kamusoko amesema licha ya jitihada walizofanya, walishindwa kuutumbukiza mpira kimiani kupitia nafasi nyingi walizotengeneza
"Bahati haikuwa upande wetu. Wenzetu wamepata nafasi moja wameitumia sisi tumeshindwa kutumia nafasi nyingi tulizotengeneza," amesema
"Benchi la ufundi limeona mapungufu yaliyojitokeza, naamini yatafanyiwa kazi mazoezini ili kuhakikisha tunapata matokeo kwenye mchezo utakaofuatia"
Katika mchezo huo Kamusoko alitolewa kwenye kipindi cha pili na nafasi yake kuchukuliwa na Amissi Tambwe
Winga Deus Kaseke alipata nafasi adimu ya kubaki yeye na mlinda lango lakini akashindwa kuutumbukiza mpira kimiani
Baada ya kupata bao la mapema kwenye dakika ya 20, Lipuli Fc ilicheza kwa kujihami zaidi na kuwapa wakati mgumu washambuliaji wa Yanga kuweza kuipenya ngome yao ya ulinzi iliyokuwa na wachezaji wengi
Kikosi cha Yanga kinatarajiwa kurejea jijini Dar es salaam leo
Kituo kinachofuatia ni mkoani Mtwara ambapo April 03 Yanga itakuwa ugenini dhidi ya Ndanda Fc
Hata hivyo kabla ya mchezo huo, Yanga itacheza na Alliance Fc katika mchezo wa robo fainali kombe la FA utakaopigwa kati ya March 25-28 2019
Baada ya kukamilika kwa michezo ya mzunguuko wa 31, ligi itasimama kupisha michezo ya mwisho ya kusaka tiketi ya kucheza fainali za AFCON 2019
Michezo hiyo itapigwa kati ya March 23-25 2019
Taifa Stars itashuka dimba la Taifa April 24 kuikabili Uganda Cranes katika mchezo ambao matokeo ya ushindi ni lazima kwa Stars huku pia ikiomba Lesotho isipate ushindi ugenini dhidi ya Cape Verde
