Baada ya kupoteza mchezo wa jana dhidi ya Lipuli Fc, hatma ya ubingwa wa ligi kuu kwa Yanga itategemea zaidi na makosa yatakayofanywa na wapinzani wao Simba
Simba ina michezo 11 mkononi na kimahesabu itakuwa na faida ya alama nane zaidi ya Yanga kama itaweza kushinda mcihezo yote
Hata hivyo, Yanga haiwezi kukata tamaa ya ubingwa wakati huu hasa ikizingatiwa iko kileleni mwa msimamo wa ligi.
Simba itahitaji kucheza, kushinda ili iweze kuifikia Yanga ambayo inaongoza kwa tofauti ya alama 16 dhidi yao
Yanga inahitaji kupata nafasi ya kushiriki michuano ya CAF msimu ujao baada ya kukosa mwaka huu
Ukiachana na ubingwa wa ligi kuu, nafasi hiyo pia inaweza kupatikana kama itatwaa taji la kombe la FA
Sasa ikiwa hatua ya robo fainali, imebakisha hatua mbili tu ili iweze kucheza fainali ya michuano hiyo itakayofanyika mwishoni mwa msimu huko Lindi
Mwishoni mwa mwezi huu Yanga itashuka dimba la CCM Kirumba kuikabili Alliance Fc katika mchezo wa robo fainali ya michuano hiyo
Hapa kocha Mwinyi Zahera na benchi lake la ufundi watapaswa kupiga hesabu kali ili kuiwezesha Yanga kupenya kwenye michuano hii ambayo ushindani umezidi kuongezeka
Yanga iliyohamishia makazi yake jijini Mwanza kwa muda, inapaswa kutilia mkazo michuano ya FA ili kujiwekea mazingira mazuri ya kupata tiketi ya kushiriki michuano ya CAF msimu ujao
