Mlinda lango wa Yanga Klausi Kindoki, ametoa siri ya kuimarika kwa kiwango chake kuwa ni kuacha kusikiliza kelele za wanaombeza na kufanya mazoezi kwa bidii.
Kipa huyo juzi aliibuka shujaa kwa kupangua penalti mbili, ikiwamo ya mwisho katika mchezo wa robo fainali ya Kombe la Shirikisho la Azam(ASFC) dhidi ya Alliance na kuiwezesha Yanga kutinga hatua ya nusu fainali.
Katika mchezo huo uliopigwa kwenye Uwanja wa CCM Kirumba, jijini Mwanza, timu hizo ziliingia katika mikwaju ya penalti baada ya kutoka sare ya bao 1-1 ndani ya dakika 90, hivyo Yanga kuibuka na ushindi wa penalti 4-3.
Kindoki alisajiliwa na Yanga msimu huu akitokea DR Congo, lakini kwa muda mrefu amekuwa hakubaliki kwa mashabiki wa kikosi hicho.
Kindoki ambaye amepita katika kipindi kigumu, amesema kwa sasa anachoangalia ni kazi yake bila kujali watu wanasema nini.
Amesema siku zote alikuwa anajiamini kuwa ni kipa mzuri na ipo siku atakubalika na kufanya kile mashabiki wa timu yake wachohitaji bila kukata tamaa.
"Sasa hivi nimeacha kufuatilia wale wanaonisema vibaya, ninafanya mazoezi kwa bidii sana na kuondoa presha ninapoingia uwanjani, unajua Yanga ina mashabiki wengi kuliko timu niliyokuwa nachezea kule Congo (DRC), Kindoki amenukuliwa na gazeti la Bingwa"
"Nina furaha kwa sasa, ninachowaambia mashabiki wa Yanga wawe na imani na mimi, kwani huo ni mwanzo na watafurahi zaidi ya hapo.
"Nitafanya mazoezi na kujituma zaidi uwanjani, nataka kuiona Yanga ikicheza fainali ya Kombe la Shirikisho (Azam Federationa Cup) na kuchukua ubingwa," amesema Kindoki.
Akizungumzia jinsi alivyofanikiwa kuivusha timu yake hatua ya nusu fainali ya ASFC, alisema kabla hawajaingia katika kupiga penalti, kocha wa makipa wa Yanga, Juma Pondamali, alimwambia aangalie mpira vizuri na kuondoa hofu.
"Nilizungumza na kocha kabla ya penalti na nimefanya kile alichoniambia, nimefuhi sana kufanikiwa kutoa zile penalti kwa sababu mchezo ulikuwa ni mgumu"
Alieleza kuwa kingine kilichomfurahisha ni kitendo cha mashabiki wa soka kumwimbia wakitaja jina lake, kwani ni mara ya kwanza inatokea tangu ametua katika kikosi hicho.
