Juzi mwamuzi mstaafu Othman Kazi alimaliza utata wa kukataliwa kwa bao halali la Yanga lililofungwa na Amissi Tambwe kwenye mchezo dhidi ya Mtibwa Sugar uliopigwa uwanja wa Jamhuri
Kupitia kipindi chake cha Kipenga, Kazi aliainisha jinsi waamuzi walivyoinyima Yanga bao halali
Lakini tukio la juzi sio la kwanza kwa Yanga kukumbana na maamuzi ya 'hovyo' yaliyoigahrimu timu hiyo matokeo muhimu
Rejea michezo dhidi ya Coastal Union na Singida United ambayo Yanga ilinyimwa mabao halali ambayo pia Kazi aliwahi kuyafanyia uchambuzi kwenye kipindi hicho. Achilia mbali michezo mingine ambayo Yanga ilishinda licha ya mabao yake mengine kukataliwa
Juzi baada ya mchezo kocha Mwinyi Zahera aliwalalamikia waamuzi kwa kuendelea kuinyima timu yake matokeo huku hali ikiwa tofauti kwa wapinzani wake katika mbio za ubingwa Simba ambao wamekuwa wakinufaika zaidi na matukio ya utata
Zahera alisema matukio haya yamekuwa yakifanywa na waamuzi bila ya wasimamizi wa mpira kuchukua hatua yoyote. Kwa tathmini yake Zahera alisema mchezo dhidi ya Mtibwa Sugar ulikuwa wa tano kwa Yanga kunyimwa matokeo
Kinachoshangaza zaidi ni Yanga kuwa muathirika mkubwa wa matukio hayo ya mabao halali kukataliwa kuliko timu nyingine
Zahera alilamikia utaratibu huu wa kuzikwamisha baadhi ya timu na kuzinufaisha nyingine kuwa hauwezi kulisaidia soka la Tanzania
