Baada ya hivi karibuni uongozi wa Yanga kuwataka wamiliki wa gazeti la Championi kuacha kuandika habari za uongo na upotoshaji zinazoihusu klabu hiyo, kocha Mwinyi Zahera nae ameshangazwa na gazeti hilo kuandika habari za uongo kuhusu usajili wa timu yake
Katika matoleo yake ya hivi karibuni, Championi limedai kuwa kocha Zahera yuko kwenye mazungumzo na wachezaji kutoka nchi za Rwanda, Kenya na Zimbabwe huku likibainisha kuwa baadhi ya wachezaji wako katika hatua za mwisho kusaini mikataba ya awali
Zahera amesema taarifa hizo hazina ukweli wowote kwani hajafanya mazungumzo na mchezaji yeyote kutoka nchi hizo
"Kuna gazeti moja la Championi linaandika vitu ya hovyo sana kufuatana kusainisha wachezaji. Wachezaji wote ambao gazeti hili linaandika tokea juzi kuwa nimesimulia nao ni uongo," amesema
"Sio kweli mimi sijasimulia na mchezaji kutoka Rwanda, Kenya wala Zimbabwe. Hakuna mchezaji ambaye amesajiliwa Yanga kutoka nchi hizo," amesema
"Habari zote hizo ni za uongo na ifahamike, hakuna chombo chochote cha habari ambacho kinafahamu usajili wa Yanga"
Msimu huu Yanga imedhamiria kufanya usajili wake kwa usiri mkubwa kuhakikisha mipango yake haivurugwi kama ilivyokuwa msimu uliopita
