Kampuni ya SportPesa ambao ndio wadhamini wa timu za Yanga na Simba, wameitangaza klabu ya Simba kuwa ndio itakayocheza na Sevilla mchezo wa kirafiki utakaopigwa May 23 katika uwanja wa Taifa
Akitangaza uamuzi wa kuichagua Simba, Katibu Mkuu wa Shirikisho la soka Tanzania (TFF), Wilfred Kidao amesema wameangalia mafanikio ya Yanga, Simba na timu nyingine za Tanzania kwenye michuano ya SportPesa iliyofanyika nchini hivi karibuni
"Ni wazi, Simba ndio klabu iliyofika hatua ya nusu fainali katika michuano ya SportPesa, hivyo tumeona ni vyema wakatuwakilisha katika mchezo huo wa Kimataifa," amesema
Awali kulikuwa na mkanganyiko wa timu ipi kati ya Yanga au Simba ipewe nafasi ya kucheza na Sevilla hali iliyopelekea kutolewa hoja ya kuzipambanisha timu hizo ili mshindi apate fursa hiyo
Mkurugenzi wa Utawala na Uzalishaji wa Sportpesa Tanzania, Tarimba Abasi amesema, mchezo huo utakuwa chachu ya maendeleo ya soka la Tanzania na utatangaza ukubwa wa soka la Tanzania katika nchi mbalimbali
