Tetesi za usajili wa mshambuliaji wa Gor Mahia Jacques Tuyisenge zimezidi kushika kasi ambapo vyombo vya habari nchini Kenya vimeripoti taarifa ya wakala wa mshambuliaji huyo Patrick Gakumba kukiri kuwa na mazungumzo na uongozi wa Yanga
Hata hivyo usajili wa mshambuliaji huyo huenda ukaipa changamoto Yanga kutokana na kiwango kikubwa cha mshahara aliotaka alipwe
Gakumba amesema mteja wake yuko tayari kutua Yanga lakini timu hiyo inahitaji kumlipa mshahara ambao ni mara tatu ya ule anaolipwa na Gor Mahia
Mshahara wa Tuyisenge katika klabu ya Gor Mahia ni zaidi ya Tsh Mil tano hivyo atailazimu Yanga imuandalie mshahara wa zaidi ya Tsh Milioni 15 kwa mwezi!
Inaelezwa mshambuliaji huyo pia anawaniwa na AS Vital Club ya DR Congo
Tuyisenge atakuwa mchezaji huru ifikapo Julai mwaka huu ambapo mkataba wake na Gor Mahia utakuwa umemalizika
Mshambuliaji huyo wa Kimataifa wa Rwanda, anataka kuondoka Gor Mahia baada ya timu hiyo kukumbwa na changamoto kubwa ya kiuchumi inayotishia mustakabali wake licha ya msimu huu kutinga robo fainali ya michuano ya kombe la Shirikisho Barani Afrika
Yanga imedhamiria kukiimarisha kikosi chake kwa ajili ya msimu ujao ambapo michakato ya usajili inaendelea 'kimyakimya'
