Ali Yanga azikwa Shinyanga

TAARIFA KWA UMMA

Uongozi wa klabu ya Yanga kwa heshima na taadhima unapenda kuwataarifu wadau wa soka nchini kuwa leo asubuhi mpendwa wetu Ally Yanga alipumzishwa katika nyumba yake ya milele mkoani kwao Shinyanga.

Klabu iliwakilishwa na mjumbe wa kamati ya Utendaji Samwel Lukumai, wanamichezo na wana Yanga wote wa Shinyanga na mikoa ya karibu.

Pia uongozi unatumia fursa hii kumshukuru mpendwa Raisi wetu wa jamhuri ya Muungano Mheshimiwa John Pombe Magufuli kwa kuguswa kwake na msiba huu wa mwanamichezo na mwana Yanga mwenzetu na kututumia salamu za rambirambi.

Kwa niaba ya wanachama Uongozi umepokea salamu hizo kwa unyenyekevu mkubwa na kuingiwa na faraja kuona kiongozi mkuu wa nchi yupo pamoja nasi katika msiba huu.

Hii inaonesha jinsi gani raisi anavyojali na kuguswa na wanamichezo.

Daima klabu ya Yanga itakumbuka mchango wa Ally Yanga kama mwanachama mwandamizi ambaye aliyatoa maisha yake kuitumikia klabu yetu katika upande wa ushangiliaji.

Klabu inasisitiza tuendelee kuiombea faraja familia yake katika kipindi hiki chote cha Majonzi.

Asanteni.

Imetolewa na idara ya habari na mawasiliano
Young African Sports Club.
22.06.2017