Baada ya kujifua kwa wiki mbili mjini Morogoro, Kikosi cha Yanga kimepanga kurejea kesho Ijumaa mchana kisha kujiandaa na mechi yao ya kimataifa dhidi ya Kariobang Sharks ya Kenya itakayopigwa siku ya Kilele cha Wiki ya Mwananchi.
Mabosi wa klabu hiyo wamejivunia kambi hiyo ya mjini Morogoro, wakidai imesaidia kwa kiasi kikubwa vijana wao kunoa makali na sasa imefika wakati wa kuwasha moto kwenye michuano ya ndani na ile ya kimataifa wakishiriki Ligi ya Mabingwa Afrika.
Mjumbe wa Kamati ya Utendaji ya Yanga Hamad Islam amesema kwamba kesho mchana kikosi chao kitaanza safari ya kurejea jijini Dar es Salaam
Islam ambaye alikuwa akiongoza usimamizi wa kambi hiyo sambamba na mjumbe mwenzake Mhandisi Bahati Mwaseba amesema kambi yao imekuwa na mafanikio makubwa
Amesema wakiwa Morogoro wachezaji na makocha wamekuwa katika utulivu mkubwa wa kupata maandalizi ya kutosha katika kujiandaa na msimu mpya
Kiongozi huyo amesema kuwa uongozi wao umeridhika na kazi iliyokuwa inafanyika katika maandalizi hayo ambapo sasa wanarejea jijini Dar es Salaam tayari kwa mchezo wa kilele cha wiki ya Mwananchi.
Aidha Islam licha ya kuwapongeza wanachama na mashabiki wa timu hiyo mkoani humo amewataka mashabiki hao kusafiri kwa wingi kwenda kuungana na wenzao katika mchezo wa Jumapili Agosti 4 dhidi ya Kariobang Sharks ya Kenya
