Wakati kikosi cha Yanga kikitarajiwa kurejea mchana wa leo Ijumaa kutoka visiwani Zanzibar, uongozi wa timu hiyo bado haujapokea leseni za wachezaji watatu kutoka Shirikisho la soka Barani Afrika (CAF)
Akizungumza na waandishi wa habari leo, Kaimu Katibu Mkuu wa Yanga Dismas Ten amesema leseni za Farouq Shikalo, David Molinga na Mustafa Suleyman bado hazijafika
Ten amesema wanafanya mawasiliano na TFF/CAF na wana matumaini ya kupokea leseni za nyota hao kwa wakati ili waweze kuwatumia kwenye mchezo huo
Kuhusu maandalizi ya timu, Ten amesema kikosi chao kimejiandaa vizuri na wana uhakika watawapa furaha mashabiki uwanja wa Taifa kesho
Hivyo amewataka mashabiki wajitokeze kwa wingi kuipa nguvu timu yao
Kikosi cha Yanga kinarejea jijini Dar es salaam leo kikitokea Zanzibar ambako kiliweka kambi ya siku tatu
Ikiwa Zanzibar Yanga ilicheza michezo miwili ya kirafiki, ambapo juzi iliichapa Mlandege Fc mabao 4-1 kabla ya kulazimishwa sare ya bao 1-1 dhidi ya Malindi Fc jana
