Kuelekea mechi yao ya marudiano ya Ligi ya Mabingwa Afrika Jumamosi ugenini dhidi ya Township Rollers, Kocha wa Yanga, Mwinyi Zahera amewatoa hofu mashabiki kuhusu kupata matokeo, huku uongozi ukiomba sapoti kubwa kutoka kwa Watanzania waishio Botswana.
Makamu Mwenyekiti wa timu hiyo, Frederick Mwakalebela, aliliambia gazeti la Nipashe kuwa, wameanza kufanya mazoezi kwenye uwanja ambao watautumia siku ya mechi na wachezaji wote wana ari kubwa ya ushindi.
"Tayari tumeanza mazoezi kwa ajili ya mchezo wa Jumamosi, lengo ni kuhakikisha tunavuka hatua hii na kuweza kusonga mbele," alisema na kuongeza kuwa jana mchana walifanya mazungumzo na Watanzania waliopo nchini humo, kwa lengo la kupanga mikakati ya ushindi.
Alisema kocha Zahera amesema anataka kufika mbali katika michuano hiyo licha ya kuwa na ushindani mkubwa.
"Zahera amesema atahakikisha tunarudi na matokeo mazuri nyumbani kikubwa anaomba dua za Watanzania"
