Baada ya kufanyika usajili makini, jambo pekee ambalo mashabiki wa Yanga wanataka kuona, ni timu yao ikifanya vizuri
Ukiachana na michezo ya kirafiki ambayo Yanga imecheza, matokeo ya mchezo wa kwanza wa ligi ya mabingwa dhidi ya Township Rollers hayakuwafurahisha wengi hasa ikizingatiwa mchezo huo ulipigwa ardhi ya nyumbani
Tayari baadhi ya mashabiki wameanza kuhoji uwezo wa kocha Zahera katika kuipa mafanikio timu hiyo msimu huu
Ni jambo la kawaida hasa pale timu inapokuwa haipati matokeo ingawa bado ni mapema sana, lakini hali hiyo ilitarajiwa
Kwa misimu miwili Yanga haikuwa katika ubora wake wa miaka mingi, hivyo baada ya usajili wa nyota wengi wapya, mashabiki walitarajia kuiona Yanga mpya
Kocha Mwinyi Zahera anafahamu kama Yanga itaondoshwa kwenye michuano ya ligi ya mabingwa hatua hii ya awali, basi atakuwa kwenye wakati mgumu
Na pengine hiyo ndio sababu iliyomfanya achukizwe na ziara ya timu yake mikoa ya Arusha na Kilimanjaro ambapo alibainisha kuwa haikuisaidia timu kwa kuwa walicheza kwenye mazingira ya viwanja ambavyo haviendani na mazingira watakayocheza huko Botswana
Hata hivyo uongozi wa Yanga umesema ziara hiyo iliikuwa na manufaa na iliandaliwa kwa matakwa ya benchi la ufundi
Lakini jambo la msingi kwake ni kuhakikisha Yanga inashinda ugenini ili kuweza kusonga mbele raundi ya kwanza
Matokeo tofauti na ushindi, yatamuweka kwenye wakati mgumu mbele ya mashabiki wa timu hiyo ambao wengi wameendelea kumuunga mkono licha ya kutoridhishwa na matokeo ya michezo ya hivi karibuni
Katika moja ya mahojiano yake, Zahera alisema wamedhamiria kushinda ugenini, lengo likiwa kupata bao mapema ili kuwaweka kwenye presha Township Rollers watakaokuwa wakicheza nyumbani
Pengine huu ndio mchezo ambao Wanayanga wataishuhudia ile timu yao halisi wanayoitaka
Lakini kama mambo yakienda 'kombo', mchezo huo utazidi kumpunguzia imani Zahera
Kwani siku zote, makocha wanaajiriwa ili wafukuzwe pale inapotokea timu haifanyi vizuri
