Kocha Mkuu wa Yanga Mwinyi Zahera amesema atalipa faini aliyotozwa kutokana na mavazi aliyovaa kwenye mchezo dhidi ya Ruvu Shooting
Aidha, ameongeza pia kuwa atavaa kama walivyotaka
Jana Kamati ya Bodi ya ligi ilitangaza kumtoza Zahera faini ya Tsh 500,000/- kutokana na kuvaa mavazi ambayo hayana staha ndani ya uwanja walipocheza mechi ya kwanza ya ligi dhidi ya Ruvu Shooting
Hata hivyo Zahera amesisitiza kuwa bado haielewi kanuni hiyo kwani haoni tatizo la mavazi yake aliyotumia August 28
"Mimi nipo tayari kulipa, lakini nashangazwa na kanuni hizi maana ukiangalia nilivaa pensi ndefu ambayo ina heshima," amesema
"Siwezi kukataa sababu wameamua, sasa hivi nitakuwa ninavaa mavazi wanayoyataka, nguo ninazo nyingi"
Pamoja na adhabu hiyo, Zahera pia alifungiwa mechi tatu akidaiwa kutoa shutuma na kejeli kwa Bodi ya Ligi katika mkutano na waandishi wa habari baada ya mechi dhidi ya Ruvu Shooting
