Zimiseleni Moyo anakaribia kutua Jangwani

Zimiseleni Moyo ni kiungo mkabaji kutoka Zimbabwe ambaye anakipiga na klabu ya Zanaco, mabingwa Zambia.

Huyu jamaa anatumia zaidi mguu wa kushoto, ni mchezaji anayeweza kucheza nafasi nyingi dimbani

Kwa aliyefuatilia michezo ya miwili ya Yanga dhidi ya Zanaco kwenye michuano ya ligi ya mabingwa ni dhahiri atakuwa amefahamu mchezaji ninaemzungumzia hapa.

Huyu jamaa yuko kwenye timu ya Taifa ya Zimbabwe na huenda kocha George Lwandamina akafanikisha jembe hili kutua Jangwani kumaliza kabisa wasiwasi kwenye nafasi ya kiungo mkabaji.

Katika ligi kuu ya Zambia hadi sasa Moyo ameweka rekodi ya kuwa kiungo aliyetoa pasi nyingi zilizofika kwa walengwa kuliko wengine, lakini pia ana rekodi ya kiungo aliyetibua zaidi mipango ya wapinzani kuliko mwingine kwenye ligi ya Zambia.

Ukizungumzia 'mkata umeme' basi huyu ndiye mwenyewe sio yule aliyenunuliwa msimu uliopita, Justine Zulu.

Moyo anafahamiana vizuri na Thabani Kamusoko ambaye walicheza pamoja nchini Zimbabwe katika timu ya Highlanders.

Mwenyewe amefunguka kuwa amevutiwa na klabu ya Yanga na hatasita kujiunga kama kila kitu kitakwenda sawa.

Yanga imedhamiria kukamilisha usajili wake kwa kuwa anafiti kabisa mapendekezo ya kocha kupata mchezaji wa kiungo wa kushoto atakeyeweza kucheza zaidi ya nafasi moja.