Yanga iliuanza mchezo wa leo dhidi ya Polisi Tanzania kwa kasi kubwa, wachezaji wakionekana kuwa na shauku ya kupata matokeo
Iliwachukua dakika sita tu kufunga bao la kuongoza kupitia kwa Mrisho Ngasa
Lakini baada ya kufunga bao hilo wachezaji walipunguza kasi, hali hiyo ilitoa nafasi kwa Polisi Tanzania kuuchukua mchezo
Mara kwa mara Yanga imekuwa ikikumbwa na changamoto hii ya wachezaji kuridhika baada ya kufunga bao la kuongoza
Mchezo wa kwanza wa ligi ya mabingwa dhidi ya Zesco uliopigwa uwanja wa Taifa, hali ilikuwa hivyohivyo
Yanga imekuwa timu inayocheza kwa vipindi. Inacheza vizuri wakati inasaka bao, ikifunga wachezaji wana 'relax'. Watazinduka tena pale wanaporuhusu bao
Kama juhudi hizo zingekuwa zinawekwa kwa muda wote wa mchezo, Yanga ingekuwa inashinda ushindi mnono
Ni suala ambalo pengine benchi la ufundi linapaswa kukaa na wachezaji watambue ushindi haupatikani kwa kufunga bao moja
Yanga leo ilikuwa na uwezo wa kushinda mchezo kwa mabao mengi kama moto walioanza nao wangeuendeleza kwa muda mrefu zaidi
Kama wafanyavyo siku zote, wachezaji walikuja kuzinduka tena baada ya timu kuwa imeruhusu mabao mawili
David Molinga alidhihirisha ubora wake kwa kutumia nafasi mbili muhimu kuirejesha Yanga mchezoni
Uchovu wa safari umechangia
Kama ilivyokuwa mchezo wa kwanza dhidi ya Ruvu Shooting, wachezaji wa Yanga waliwasili kutoka Zambia juzi usiku, hivyo wamepumzika siku moja na leo kurejea dimbani
Sadney Urikhob alionekana dhahiri amechoka pamoja na Juma Balinya
Benchi la ufundi walifanya uamuzi sahihi wa kuwatoa wakati wa mapumziko
Mabao mawili yaliyofungwa na Nchimbi kwenye kipindi cha pili yalitokana na uzembe wa mabeki. Mtoni, Yondani na Lamine walipoteza umakini kwenye mchezo wa leo
Kwa kiasi flani,walionekana hawako kwenye ubora wao wa siku zote
