Kesho Jumapili Yanga itashuka uwanja wa June 30 kuikabili Pyramids Fc ukiwa mchezo wa marudiano kombe la Shirikisho barani Afrika
Mchezo huo utakaopigwa saa tatu usiku, utakuwa wa pili baina ya timu hizo ambazo wiki iliyopita zilicheza jijini Mwanza na Pyramids Fc kushinda 2-1
Kikosi cha kocha Mwinyi Zahera kitaingia kwenye mchezo huo kikiwa na mahitaji ya ushindi wa angalau mabao mawili ili kuwa na nafasi ya kutinga hatua ya makundi
Lolote linaweza kutokea
Wakati mashabiki wakionyesha kukata tamaa na timu yao kutokana na matokeo ya mchezo wa kwanza, hali ni tofauti kwa wachezaji
Morali ya wachezaji iko juu, wamekuwa wakihamasishana huku wengine waitumia kurasa zao za mitandao ya kijamii kuwahamasisha mashabiki
Hakuna shaka mchezo huo utakuwa mgumu kwa Yanga kwani Pyramids watakuwa wakicheza mbele ya mashabiki wao
Lakini kama wachezaji wa Yanga watakuwa na nidhamu, wanaweza kuwashangaza Pyramids
Zahera anafahamu kitakachotokea kama akifungwa
Hakuna ubishi, kibarua cha kocha Mwinyi Zahera kiko shakani kutokana na mwenendo wa Yanga msimu huu
Kipigo cha mchezo wa kwanza kiliwachochea mashabiki kushinikiza kocha huyo atimuliwe
Njia pekee ya kutuliza hali hiyo ni kwake kupata ushindi Misri
Kama Yanga itafungwa tena na Pyramids Fc, mashabiki hawatajali ukubwa wa timu hiyo, watakachotaka kuona ni kocha huyo kuonyeshwa mlango wa kutokea
Aidha imefahamika hata Kamati ya Utendaji ya Yanga ili-ahirisha kikao kilichokuwa kifanyike juzi kumjadili, kikao hicho kitafanyika baada ya mchezo huo
