Yanga leo ina kazi kubwa ya kupata ushindi mbele ya Pyramids Fc mchezo wa marudiano kombe la Shirikisho wakihitaji kupata ushindi angalau wa mabao 2-0 ili kutinga makundi
Matokeo ya mchezo wa kwanza uliopigwa jijini Mwanza ndio yaliyoiweka Yanga kwenye wakati mgumu baada ya kukubali kipigo cha mabao 2-1
Katika mechi tisa ambazo Yanga imecheza Misri, matokeo mazuri yaliyopatikana ni sare dhidi ya Ismailia
Mechi nyingine Yanga ilipoteza dhidi ya miamba ya soka Al Ahly na Zamaleki ingawa mwaka 2014 nusura ipenye mbele ya Al Ahly baada ya kufungwa kwa changamoto ya mikwaju ya penati
Penati zilipigwa baada ya Yanga kushinda 1-0 nyumbani na Al Ahly kushinda 1-0 hapo Misri
Lakini katika mechi za hivi karibuni pamoja na kupoteza, Yanga imekuwa ikitoa ushindani mkali inapocheza Misri
Mchezo wa mwisho Yanga kupoteza Misri, ilifungwa 2-1 na Al Ahly katika mchezo ambao Al Ahly walikuwa na wakati mgumu kwelikweli
Hivyo kama Yanga itafanikiwa kuibuka na ushindi leo, itaanza ukurasa mpya dhidi ya timu za Misri
Mafanikio ya Yanga kwenye mchezo wa leo, yatatokana na utulivu wa wachezaji
Dakika za mwanzo ni muhimu sana kwa Yanga kuhakikisha hawaruhusu bao la mapema
Kwani moja ya mbinu zinazotumiwa na timu za Misri ni kuwaweka katika presha kubwa wapinzani wao kwenye dakika za mwanzoni ili kupata mabao ya mapema
Lakini kama Yanga itafanikiwa kuwazuia Pyramids kwa dakika zote 45 za kipindi cha kwanza, uwezekano wa kuwafunga kwenye kipindi cha pili ni mkubwa
Takwimu zinaonyesha Pyramids imekuwa ikiruhusu mabao mengi kwenye kipindi cha pili hasa dakika 15 za mwisho
