Julai mwaka 2018 Charles Mkwasa alijiuzulu nafasi ya Katibu Mkuu wa Yanga baada ya kupata maradhi ambayo yalimlazimu kwenda nchini India kutibiwa
Tangu wakati huo, Yanga haikuwa na Katibu Mkuu wa kudumu mpaka hapo jana ilipomtangaza rasmi Dk David Ruhago kushika nafasi hiyo
Katika kipindi cha zaidi ya mwaka mmoja tangu kuondoka kwa Mkwasa, nafasi hiyo imekaimiwa na viongozi watatu tofauti ambao ni Omar Kaya, Dismas Ten na Thabit Kandoro aliyekaimu nafasi hiyo kwa siku 11 tangu Novemba 1, mwaka huu
Ruhago amewahi kuwa Mjumbe wa Kamati mbalimbali za Yanga katika vipindi tofauti, uteuzi wake ulikuwa ukisubiri kutangazwa tu, kwani alifahamika toka mwezi Septemba akipitishwa sambamba na viongozi wengine wapya ambao walitangazwa wakati huo Hassan Bumbuli (Afisa Habari) na Antonio Nugaz (Msemaji/Afisa Uhamasishaji)
Kama Katibu Mkuu wa Yanga, Ruhago atakuwa Mtendaji Mkuu wa klabu hiyo, atasimamia shughuli zote za kila siku za timu
Miongoni mwa mambo ambayo Wanayanga watapenda kuona anayasimamia na kuyapatia ufumbuzi, ni pamoja na suala linalomhusu beki Andrew Vicent Chikupe ambaye amegoma kujiunga kikosini mpaka alipwe madai yake ya fedha za usajili yanayofikia Milioni 54
Baada ya mvutano wa hapa na pale, Chikupe amepeleka malalamiko yake TFF ambapo inaelezwa Yanga imepewa muda wa kumaliza sintofahamu ya suala hilo kabla ya uamuzi wa mwisho kuchukuliwa na TFF
Lakini pia kuna suala la mabadiliko ya mfumo wa uendeshaji wa Yanga. Suala hili limezungumzwa sana wakiwemo viongozi wapya ambapo Mwenyekiti wa Yanga Dk Mshindo Msolla ilikuwa moja ya ajenda zake
Hata hivyo bado hakuonekani kuwa na mchakato hata wa awali unaoashiria kuwepo kwa utekelezaji wake
Angalau wakati wa Mkwasa, aliunda Kamati iliyopewa kazi ya kuthaminisha mali za klabu kabla kuingia hatua ya pili ya mchakato
Kama Mtendaji Mkuu, hili ni eneo ambalo Ruhago anaweza kuwa na mchango mkubwa
