Dirisha dogo la usajili litafunguliwa Disemba 16, yakiwa ni mabadiliko tofauti na misimu iliyopita ambapo dirisha lilifunguliwa Novemba 15 na kufungwa Disemba 15
Mapema leo, akizungumza baada ya mazoezi ya kikosi chake yaliyofanyika uwanja wa Uhuru, Kaimu Kocha Mkuu wa Yanga Charles Mkwasa amesema watatumia dirisha hilo kuongeza wachezaji wapya kulingana na mahitaji ya timu
Mkwasa ameeleza kubaini mapungufu kadhaa kwenye kikosi chake ambapo amesema wanahitaji kusajili nyota wapya
"Kiukweli kwa muda ambao nimekaa na timu kuna vitu ambavyo nimeviona miongoni mwa hivyo ni kufanya usajili wakati wa dirisha dogo,” amesema
"Bado sijakutana na kuzungumza na viongozi wangu lakini siku si nyingi nitakutana nao na kuwaeleza kuwa tunatakiwa kuongeza wachezaji kulingana na mahitaji ya timu yetu"
"Siwezi kusema wazi timu ina mapungufu maeneo gani kwani sitakiwi kuliweka hili hadharani mpaka hapo nitakapowaambia viongozi wangu"
Hata hivyo Mkwasa amesema kuna mabadiliko anayaona kwenye kikosi chake tangu alipoanza majukumu yake wiki iliyopita
Amesema anaamini timu itaendelea kuimarika na baadae kuwa imara
"Kiujumla mpaka sasa timu inaendelea vizuri kulingana na mazoezi ambayo tumefanya na naamini muda ambavyo unavyozidi kwenda timu itabadilika na kuwa imara zaidi"
