Mwenyekiti wa Yanga Dk Mshindo Msolla amesema usajili wa mshambuliaji Tariq Seif Kiakala ni mwanzo tu, kwani wanatarajia kusajili nyota wengine kulingana na mapendekezo yaliyotolewa
Akizungumza mapema leo wakati wa utambulisho wa mshambuliaji huyo, Dk Msolla alisema pamoja na changamoto ambazo timu inapitia, watahakikisha wanakiboresha kikosi chao ili kiwape furaha mashabiki
"Kuna maeneo kadhaa ambayo wadau wetu mmetoa maoni kuwa yanahitaji kuboreshwa. Tumeanza na Tariq, huu ni mwanzo tu kwani tumejipanga kuboresha sehemu zote zenye mapungufu," amesema
"Tunawaomba mashabiki wampokee na kumpa ushirikiano Tariq, sisi viongozi tutampa ushirikiano ili kuhakikisha tunatimiza malengo tuliyojiwekea"
"Tariq ni mchezaji mzuri kwa wale wafuatiliaji wa soka la Tanzania, jina lake sio geni kwani amewahi kutamba vilabu vya Stand United na Biashara United kabla ya kwenda Misri kujaribu bahati yake"
Utambulisho wa mshambuliaji huyo ulirushwa 'mbashara' na Azam TV, utaratibu ambao uongozi wa Yanga umeahidi kuendelea kuutumia kwa nyota wengine watakaosajiliwa
Mshambuliaji huyo huenda akasafiri leo kuelekea mkoani Kigoma kuungana na kikosi cha Yanga ambacho leo kinashuka dimbani kuumana na Mwamgongo Fc
Tariq anaweza kuwahi mchezo wa Jumapili ambao ni dhidi ya Mbao Fc
