Ni Ajib kila kona

Ibrahim Ajib Migomba ameirudisha furaha ya mashabiki wa Yanga iliyoonekana kufifia mwanzoni mwa msimu.

Mabao yake matano yameivusha Yanga kutoka kwenye kipindi kigumu na sasa kuna kila dalili ya kicheko kwa kipindi chote kilichobaki kuelekea ubingwa wa nne mfululizo.

Mabao ya mkali huyo yamewapagawisha wengi mpaka wengine kuamini thamani yake unaweza hata ukaombea mkopo benki!

Aidha mafanikio yake ndani ya kikosi cha Yanga yamemuweka kwenye wakati mgumu kiungo Haruna Niyonzima aliyewahi kuwa kipenzi cha mashabiki wa Wana Jangwani kabla hajaamua kutimkia Simba msimu uliopita.

Kumekuwa na mlinganisho baina ya wachezaji hao wawili 'waliobadilishana' timu lakini ni Yanga inayonufaika zaidi na usajili wa Ajib.

Akiwa amenunuliwa Yanga kwa kadirio la Mil 50, Ajib tayari amepachika mabao matano ya kutengeneza mengine kadhaa.

Wakati upande wa Niyonzima mambo hayamuendei vizuri ndani ya kikosi cha Simba.

Licha ya kununuliwa kwa zaidi ya Mil 120, na kuwa mchezaji anayelipwa pesa ndefu zaidi katika kikosi cha Simba, bado hajafanikiwa kufunga wala kutengeneza bao lolote.