Kikosi cha Yanga kiliwasili Moshi jana na kuanza maandalizi ya mchezo wa ligi kuu dhidi ya Polisi Tanzania ambao utapigwa kesho Jumanne kwenye uwanja Ushirika
Leo Yanga itafanya mazoezi yake ya mwisho kwenye dimba la Ushirika ambalo litatumika kesho
Yanga imetua Moshi ikiwa na kikosi chake kamili ambapo kocha Luc Eymael ameahidi kuweka 'mashine' zake zote ili kuhakikisha wanapata ushindi
Mchezo uliopita dhidi ya Prisons ambao ulimalizika kwa suluhu ya bila kufungana, Eymael alifanya mabadiliko madogo ya kikosi chake akiwapa mapumziko baadhi ya wachezaj huku Haruna Niyonzima akikosekana kutokana na ugonjwa wakati Ditram Nchimbi alitumikia adhabu ya kadi tatu za njano
Habari njema ni kuwa Niyonzima amesafiri na timu Moshi wakati Nchimbi amemaliza adhabu hivyo nyota hao wanaweza kurejeshwa kikosi cha kwanza kesho kutegemea na utimamu wao
Mchezo dhidi ya Polisi Tanzania hautakuwa mwepesi hivyo Yanga itapaswa kutumia silaha zake zote ili kujiwekea mazingira mazuri ya kushinda
Polisi Tanzania inawajumuisha baadhi ya nyota waliowahi kuitumikia Yanga kama Pato Ngonyani, Pius Buswita na Matheo Anthony ambaye yuko kwenye kiwango bora sana
