Bosi wa zamani Simba akiri Tshishimbi ni habari nyingine

Katibu Mkuu wa zamani wa Simba Mwina Kaduguda ‘Simba wa Yuda’ amekubali uwezo wa kiungo wa Yanga Papy Kabamba Tshishimbi raia wa Jamhuri ya Kidemokrasia ya Kongo kutokana na uwezo mkubwa aliouonesha kwenye mechi ya Yanga vs Simba Jumamosi ya October 28, 2017.

Kaduguda amesema ukiwa na wachezaji watatu wenye uwezo kama wa Tshishimbi timu yako inacheza mashindano ya Afrika kwa raha.

“Kuna mtu mmoja hatari sana mimi nimemkubali anaitwa Tshishimbi, yule jamaa kila mpira unapotua yupo ana nguvu, stamina na pasi zake zina macho anapiga popote anapotaka. Alikosa magoli baada ya kupiga mikwaju miwili, ukiwa na wachezaji watatu kama wale unacheza kombe la klabu bingwa Afrika kwa raha”-Kaduguda.

“Lakini vilevile kulikuwa na Buswita pamoja na Raphael Daud walikata eneo la kiungo na kuwafunika wachezaji wa Simba eneo la kiungo ni sawa na injini.”

Kaduguda amesema viongozi wa Simba hawapaswi kujivunia kuwa na pesa na wachezaji wa gharama kwa sababu pesa pekeake hajiwahi kuleta ubingwa.

“Viongozi wasiridhike na uwezo wa kipesa, pesa pekeyake haijawahi kuleta mafanikio bila kuwa na wataalam kwa mfano kuwa na benchi la ufundi. Kitu cha msingi kama Simba wanataka ubingwa wanatakiwa kuwa wamoja, Simba imekosa ubingwa kwa muda mrefu kwa sababu wameuacha umoja.”

Kwa hisani ya ShaffihDauda