Uongozi wa klabu ya Azam Fc umesema uko tayari kumuachia kiungo wake Abubakar Salum 'Sure Boy' kwa Yanga au timu yoyote inayomtaka kama watafikia makubaliano
Kumekuwa na taarifa Sure Boy aliyeichezea Azam Fc kwa misimu 10, ni miongoni mwa wachezaji waliopendekezwa kwenye usajili wa kocha Luc Eymael
Msemaji wa Azam Fc Zakaria Thabith 'Zaka Zakazi' amesema nyota huyo bado ana mkataba na Azam Fc lakini hilo halizuii kwao kufanya mazungumzo na timu inayotaka huduma yake
"Tunasikia kuwa kuna baadhi ya timu zinamuhitaji mchezaji wetu Salum Aboubakar, ila sisi tunachojua ni kuwa bado mchezaji huyo ana mkataba na Azam lakini hilo haliondoi uwezekano wa kumpata kwa klabu yoyote inayomuhitaji"
"Unajua kuna wakati wachezaji wanaweza kuvutiwa na mkakati fulani kutoka klabu nyingine jambo ambalo linakubalika, hivyo kama Yanga watakuja mezani tukazungumza na mchezaji mwenyewe akaridhia basi sisi hatuna kipingamizi tutaruhusu aende," alisema
Baada ya sakata la Gadiel Michael, Azam Fc na Yanga kwa sasa zimerejesha mahusiano mema ya kibiashara katika masuala ya usajili
Mwezi Januari Yanga ilimsajili Ditram Nchimbi kutoka Azam Fc ingawa alikuwa akiitumikia kwa mkopo Polisi Tanzania
Miaka ya nyuma Azam Fc iliwahi kuwasajili 'kibabe' nyota wa Yanga Frank Domayo na Didier Kavumbagu usajili ambao uliwakera mabosi wa Yanga ambao walikuja kumsajili kibabe Gadiel Michael usajili ambao ulisababisha mvutano baina ya timu hizo
