Kocha Mkuu wa Yanga Luc Eymael amesema wakati huu ambao ligi zimesimama huku akishindwa kusafiri kurejea nchini kutokana na changamoto ya corona, amekuwa akijiongezea ujuzi kupitia utaalamu wa makocha mbalimbali duniani
Eymael amekwama Ubelgiji baada ya kukosa usafiri wa ndege kurejea nchini, Ubelgiji na Tanzania zote zikiwa zimezuia safari za Kimataifa
"Wakati nasubiri ndege ziruhusiwe kutua Tanzania, nimenunua vitabu mbalimbali vilivyoandikwa na makocha tofauti waliofanikiwa ili kujifunza mbinu mpya na nitakaporudi nitazitumia kwenye michezo iliyosalia pamoja na kuimarisha kikosi kwa msimu unaokuja wa Ligi Kuu Tanzania Bara," amesema
Mbelgiji huyo amesema muda sio mrefu anaweza kurejea nchini, hivyo anatumia kipindi hiki kujiandaa kwa mbinu mpya zitakazomsaidia kutengeneza kikosi chenye ushindani kutimiza malengo ya kutwaa ubingwa katika msimu unaokuja wa ligi.
Amesema nyumbani muda wote bila kazi inaumiza, lakini kupitia kusoma vitabu itamsaidia kujua mbinu ambazo anaweza akawapa wachezaji wake kulingana na miundo mbinu ya viwanja vilivyopo nchini
